മാത്തൂർ ശിവക്ഷേത്രം

*മാത്തൂർ ശിവക്ഷേത്രം...*

പരശുരാമൻ സ്ഥാപിച്ചു എന്നു വിശ്വസിക്കപ്പെടുന്ന 108 ശിവക്ഷേത്രങ്ങളിൽ ഒന്നാണിത്.

നൂറ്റാണ്ടുകൾ പഴക്കമേറിയ ഈ ശിവക്ഷേത്രം സ്ഥിതിചെയ്യുന്നത് തൃശൂർ ജില്ലയിലെ പന്നിതടം ഗ്രാമത്തിലാണ്.ഇവിടുത്തെ ശിവലിംഗം രുദ്രാക്ഷശിലയിൽ നിർമ്മിച്ചതാണ്.

സദാശിവനായ പ്രധാനമൂർത്തിയുടെ ദർശനം പടിഞ്ഞാറോട്ടും,
പാർവ്വതീദേവി അതേ ശ്രീകോവിലിൽ കിഴക്കോട്ടും ആയി കുടികൊള്ളുന്നു.
ഒരേ വട്ടശ്രീകോവിലിൽ കിഴക്കും പടിഞ്ഞാറുമായി ശിവ-പാർവ്വതിമാരെ പ്രതിഷ്ഠിച്ചിരിക്കുന്നു.

നൂറ്റാണ്ടുകൾ പഴക്കമേറിയതാണിവിടുത്തെ ശ്രീകോവിൽ. ചേരകാലത്തിന്‍റെ  കഥകൾ പറയുന്നവയാണിവിടുത്തെ ക്ഷേത്ര നിർമ്മിതി.മുൻപ് ദേശാധിപത്യമുള്ള ക്ഷേത്രമായിരുന്നു ഇത്. ക്ഷേത്ര നിർമ്മിതി അതിനുതകുംവിധം പ്രൗഢഗംഭീരമായിട്ടാണ് നിർമ്മിച്ചിരിക്കുന്നത്. വളരെ വിശാലമാണ് ഇവിടുത്തെ ശ്രീകോവിൽ. വർത്തുളാകൃതിയിൽ നല്ല ഉയരത്തിൽ ഒറ്റ നിലയിൽ കിഴക്കും പടിഞ്ഞാറും ദർശനം വരും വിധമാണ് ശ്രീകോവിൽ നിർമ്മിതി.

ശ്രീകോവിലിനു പടിഞ്ഞാറു വശത്ത് ചെറിയ നമസ്കാര മണ്ഡപം നിർമ്മിച്ചിട്ടുണ്ട്. ഈ രണ്ടു നിർമ്മിതികളും വളരെ പഴക്കമേറിയതാണ്. എന്നാൽ നാലമ്പലവും മറ്റും അത്ര പഴക്കമുള്ളവയല്ല. പടിഞ്ഞാറു വശത്തുമാത്രമെ നാലമ്പലം പൂർണ്ണമായി നിർമ്മിച്ചിട്ടുള്ളു. നാലമ്പലത്തിനു പുറത്തായി വലിയ ബലിക്കല്ല് പ്രതിഷ്ഠിച്ചിട്ടുണ്ട്. നാലമ്പലത്തിനുള്ളിൽ തന്നെ തിടപ്പള്ളിയും ക്ഷേത്രക്കിണറും കാണാം. ദ്രാവിഡീയ-കേരളാ ശില്പ വൈദഗ്ധ്യം ശ്രികോവിലിന്‍റെ  നിർമ്മിതിയിൽ കാണാൻ സാധിക്കും. ഏകദേശം 1500 വർഷങ്ങളുടെ പഴക്കേറിയ ഈ ക്ഷേത്ര സമുച്ചയം രണ്ടാം ചേരസാമ്രാജ്യത്തിന്‍റെ  സംഭാവനയാവാം.

അർദ്ധനാരീശ്വര സങ്കല്‍പ്പമുള്ള അപൂർവ്വം ക്ഷേത്രങ്ങളിൽ ഒന്നാണ്.ക്ഷേത്രേശന്‍റെ  രൗദ്രത കുറക്കാനാവാം പടിഞ്ഞാറു ഭാഗത്ത് കുളം നിർമ്മിച്ചിരിക്കുന്നത്. ഉപദേവന്മാരായി ദക്ഷിണാമൂർത്തിയും, ശാസ്താവും, ഗണപതിയും, നാഗയക്ഷിയും ഉണ്ട്.

തൃശൂരിൽ, കുന്നംകുളം- വടക്കാഞ്ചേരി റോഡിലായി പന്നിതടം ഗ്രാമത്തിലാണ് സ്ഥിതിചെയ്യുന്നത്.

ഓം നമഃ ശിവായ