ശിവനില്‍ സര്‍വ്വദേവന്‍മാരും വസിക്കുന്നു

ശിവനില്‍ സര്‍വ്വദേവന്‍മാരും വസിക്കുന്നു.

🙏 സര്‍വ്വദേവന്മാരിലും ശിവനും വസിക്കുന്നു. ശിവന്റെ വലതുവശത്ത് സൂര്യനും ബ്രഹ്മമാവും, ഗാര്‍ഹപത്യം, ദക്ഷിണം, ആഹവനീയം എന്നീ മൂന്നഗ്നികളും വസിക്കുന്നു. ഇടതുഭാഗത്ത് ഉമയും വിഷ്ണുവും സോമനും സ്ഥിതിചെയ്യുന്നു. ആരാണോ ഗോവിന്ദനെ നമസ്‌ക്കരിക്കുന്നത് അവര്‍ ശിവനെത്തന്നെയാണ് നമസ്‌കരിക്കുന്നത്. ആരാണോ വിഷ്ണുവിനെ ഭക്തിയോടെ പൂജിക്കുന്നത് അവര്‍ വൃഷധ്വജനായ ശിവനെത്തന്നെയാണ് പൂജിക്കുന്നത്. ശിവനെ ദ്വേഷിക്കുന്നവര്‍ വിഷ്ണുവിനെത്തന്നെയാണ് ദ്വേഷിക്കുന്നത്. ശിവനെ അറിയാത്തവര്‍ വിഷ്ണുവിനെയും അറിയുന്നില്ല.

‘പുല്ലിംഗം സര്‍വമീശാനം

സ്ത്രീലിംഗം ഭഗവത്യുമാ’ (രുദ്രഹൃദയോപനിഷത്ത്)

 ഇങ്ങനെ അനേകം ഉദാഹരണങ്ങള്‍കൊണ്ടു സ്ഥാപിച്ചിരിക്കുന്നത് സര്‍വദേവതൈക്യമാണ്. ദേവീസങ്കല്പത്തെ സ്ത്രീസങ്കല്പത്തിലും ദേവസങ്കല്പത്തെ പുരുഷരൂപത്തിലും വ്യത്യസ്തവ്യക്തികളായി ധരിക്കുന്നവര്‍ക്ക് ഈ തത്ത്വം മനസ്സിലാക്കുവാന്‍ പ്രയാസമുണ്ട്. അചഞ്ചലനായ പുരുഷന്റെ വ്യാപാരശക്തിയാണ് ഉമയെന്നും, ദേവിയെന്നും വിശേഷിപ്പിച്ചിരിക്കുന്നത്. ഒരു വ്യക്തിയെക്കൂടാതെ ശക്തിയുണ്ടാകുന്നില്ല. ശക്തി വ്യക്തിയില്‍ അടങ്ങിയിരിക്കുന്നു. ഈ ശക്തിക്ക് രൂപകല്പന നടത്തിയതാണ് ദേവീസങ്കല്പം. ഉപാസനാശേഷികൊണ്ട് തപസ്വികളായ ആചാര്യന്‍മാര്‍ക്ക് ഈ വ്യക്തിഭാവത്തിന് സജീവമായ സരൂപത ലഭിച്ചിട്ടുണ്ട്. ശക്തിയും അചഞ്ചലനായ പുരുഷന്റെ വ്യാപനസ്വഭാവമാണ്. ഇക്കാരണത്താല്‍ ഉമയും ശങ്കരനും വിഷ്ണുവും ഒന്നാണെന്നും തെളിയുന്നു.

‘ഉമാശങ്കരയോഗോ യ:

സയോഗോ വിഷ്ണുരുച്യതേ’

പുരുഷനും ശക്തിയും, രുദ്രനും ഉമയും ഒന്നുതന്നെയാണെന്നും, സര്‍വദേവതാഭാവങ്ങളുടെയും ദേവീ സങ്കല്‍പങ്ങളുടെയും തത്ത്വം ശിവശക്തൈ്യക്യമാണെന്നും മേല്‍പറഞ്ഞ ഉപനിഷദ് വാക്യങ്ങളിലൂടെ ധരിക്കേണ്ടതാണ്. ഗന്ധവും പുഷ്പവും പോലെയും അര്‍ഥവും വാക്കും പോലെയും, പകലും രാത്രിയും പോലെയും, നിഴലും വെളിച്ചവും പോലെയും, ശിവനും ശക്തിയും, ദേവനും ദേവിയും അഭേദ്യവ്യക്തിത്വമാണ്

🙏

ശങ്കര മാഹാത്മ്യം 

🙏

ഭഗവാൻ ശ്രീ പരമേശ്വരനെ കുറിച്ചുള്ള ശുക ബ്രഹ്മര്‍ഷിയുടെ ചോദ്യത്തിന്  പിതാവായ വ്യാസ മഹർഷി നൽകിയ ഉത്തരം ഇങ്ങനെ... 

  ‘സര്‍വദേവാത്മകോ രൂദ്ര:

സര്‍വദേവാ: ശിവാത്മക:

രുദ്രസ്യ ദക്ഷിണേ പാര്‍ശ്വേ:

രവിര്‍ ബ്രഹ്മാ ത്രയോഗ്നയ:

വാമപാര്‍ശ്വേ ഉമാദേവീ

വിഷ്ണു: സോമോപി തേ ത്രയ:

യാ ഉമാ സാസ്വയം വിഷ്ണുര്‍-

യോ വിഷ്ണു: സ ഹി ചന്ദ്രമാ:

യേ നമസ്യന്തി ഗോവിന്ദം

തേ നമസ്യന്തി ശങ്കരം

യേര്‍ച്ചയന്തി ഹരിം ഭക്ത്യാ

തേര്‍ച്ചയന്തി വൃഷധ്വജം

യേ ദ്വിഷന്തി വിരൂപാക്ഷം

തേ ദ്വിഷന്തി ജനാര്‍ദനം

യേ രുദ്രം നാഭിജാനന്തി

തേ ന ജാനതി കേശവം

എല്ലാവർക്കും എപ്പോഴും ശിവഭഗവാൻ്റെ അനുഗ്രഹം ഉണ്ടാകുമാറാകട്ടെ🙏

കടപ്പാട്

Fb post